دانیشتنی دادگاییکردنی 12 کەس، لە نێویاندا ئەکرەم ئیمامئۆغڵو، سەرۆکی گەورەشارەوانیی ئیستەنبووڵ، بە تۆمەتی "ئەنجامدانی ناڕێکی و پێشێلکاری" لە کاتی 38ەمین کۆنگرەی گشتیی پارتی گەلی کۆماری (جەهەپە)، بۆ 18ی تشرینی دووەم دواخرا. چوارشەممە، لە 26ەمین دادگای تاوانە سەرەتاییەکانی ئەنقەرە، دانیشتنێکی دیکەی دۆسیەی لێکۆڵینەوە لە پێشێلکارییەکانی 38ەمین کۆنگرەی گشتیی جەهەپە بەڕێوەچوو. لە دانیشتنەکەدا هەردوو تۆمەتبار، باکی ئایدۆنەر و ئەرکان ئایدن، لەگەڵ پارێزەرانی دۆسیەکە ئامادە بوون.