چەکدارانی حووسی زنجیرەیەک هێرشی مووشەکی و درۆنییان کردە سەر شاری عەدەن، کە بارەگای حکوومەتی دانپێدانراوی نێودەوڵەتیی یەمەنە، هاوکات سعوودیەش بەرپەرچدانەوەی چەندین مووشەکی ئەو گرووپەی بەرەو ریازی پایتەخت راگەیاند. بەگوێرەی سەرچاوە ئەمنییەکان، هێرشەکانی عەدەن کەمپەکانی هاوپەیمانیی بە سەرۆکایەتیی سعوودیە و هێزەکانی حکوومەتی یەمەنیان لە رۆژئاوا و ناوەندی شارەکە کردووەتە ئامانج؛ لە هێرشەکاندا دوو مووشەک و درۆنێک بەکارهێنراون کە درۆنەکە پێش پێکانی ئامانجەکەی تێکشکێنراوە.