بەشداربووانی بانکی تەیفی ئیسلامی لە عێراق ناتوانن ئەو پارەیەی لە بانکەکە دایانناوە، بە تەواوی و دەستبەجێ وەریبگرنەوە. ئێستا بانکەکە لەژێر سەرپەرشتیی بانکی ناوەندیدایە، هاووڵاتییانیش داوای چارەسەرێکی گونجاو دەکەن. کۆی ئەو پارەیەی لەم بانکەدا راگیراوە بە دەیان ملیار دینار دەخەمڵێنرێت. دایکی ئەحمەد، یەکێک لە خاوەن پارەکان، زیاتر لە مانگێکە لە نێوان پارێزگاکاندا هاتووچۆ دەکات بۆ راکێشانی پارەکەی، بەڵام بێ سوود بووە.