سلێمانی، لە بوارە جیاوازەکانی کولتوور و ڕۆشنبیرییدا، بەدیاریکراوییش هونەرەکان، پێشەنگە و ناوێکی دیاری هەرێمی کوردستان و ناوچەکەیە، هەوێنی دامەزراندنی یەکەم گرووپ و تیپە هونەرییەکانە، لەوانە یەکەم تیپی موزیکیی کوردستان و پێشکەشکردن و نواندن. بەگوێرەی بەڵگەنامەکان، "تیپی مۆسیقای مەولەویی کۆن"، یەکەم تیپی موزیکیی کوردییە، کە ساڵی 1955، لە شاری سلێمانی و بە سەرپەرشتیی قادر دیلان دامەزراوە، بە یەکەم تیپی موزیکیی کوردییش دەناسرێت، کە ئەندام و دامەزراوەی فەرمیی هەبووبێت.